BAKI, 12 mart — Sputnik. Rusiya prezidentinin sağ əli kimi tanınan, Putinin hərbi və texniki əməkdaşlıqdan məsul köməkçisi Vladimir Kojin Türkiyə ilə əldə olunan S-400 razılaşmasına dair maraqlı açıqlama verib. Kojin, türk tərəfinin S-400 zenit-raket komplekslərini təhvil almaq üçün onları tələsdirdiyini söyləyib.
"Türkiyə S-400-lərin təslimi ilə bağlı tələsməyimizi istəyir. Biz də onların tələbini nəzərə alaraq 2020-ci ilin əvvəlində sözügedən raketləri onlara təhvil verəcəyik" — rus rəsmi bildirib.
Sputnik Azərbaycan "Timeturk"ə istinadən xəbər verir ki, Türkiyə ilə Rusiya arasında S-400 zenit raket komplekslərinin alınmasına dair saziş imzalanıb. Sazişə əsasən Türkiyə Rusiyadan 4 ədəd bu tip havadan müdafiə sistemi əldə edəcək.
Müqavilə reallaşsa, Türkiyə S-400 raketinə sahib ilk NATO ölkəsi olacaq. Bundan əvvəl Yunanısatan Rusiyadan S-300 kompleksləri almışdı.