Elxan Cəfərov: ““Oskar” haqqında danışmaq tezdir”
Azərbaycan filmləri davamlı olaraq beynəlxalq müsabiqələrdə iştiraka təqdim edilir. Buna baxmayaraq kino sahəsində elə də ciddi uğurumuz yoxdur. Kinorejissor Elxan Cəfərov Sputnik Azərbaycan-a deyir ki, Azərbaycan kinosu inkişaf dövrünü yaşayır:
“Bu günlərdə “Oskar” haqqında danışmaq tezdir. Azərbaycan kino sənayesi tam formalaşdıqdan, normal vəziyyətə gəlib-çatdıqdan sonra “Oskar” haqqında danışmaq olar. Onu da nəzərə almaq lazımdır ki, “Oskar” müəyyən məqamlarda siyasi mesajlar daşıyır. Demək olmaz ki, kinomuz sonuncu inkişaf mərhələsindədir. Hələ qarşıda 3-4 vacib mərhələ dayanıb. Onları keçdikdən sonra böyük festivallar haqqında danışmaq olar ”.
Qeyd edək ki, ən məşhur və nüfuzlu kino mükafatı olan “Oskar”Amerika Kinematoqrafiya İncəsənəti və Elmləri Akademiyasının 90 illik yubiley mərasimində, martın 4-də Los-Ancelesin Dolbi Teatrında (Dolby Theatre) təqdim ediləcək.