BAKI, 28 fevral — Sputnik. İran artıq İsrailin bütün nöqtələrini vurmağa qadirdir. Son günlər dünya mediası bu xəbərlə çalxalanır.
Sputnik AzərbaycanAnadolu Agentliyinə istinadən xəbər verir ki, beynəlxalq mətbu orqanlar iddianı peykdən çəkilən son görüntülərə əsasən irəli sürür. Bu sahədə kifayət qədər nüfuzlu kosmik təşkilat olan "ImageSat International"-ın yaydığı fotolarda İranın Suriyadakı hərbi raket bazaları açıq-aşkar nəzərə çarpır.
Xüsusilə paytaxt Dəməşqdəki bazalar İsrail üçün ən ciddi təhdid hesab oluna bilər. Çünki Dəməşqdə İrana aid olan bazalarda yerləşdirilən müasir raketlər İsrailin bütün nöqtələrini yox etməyə qadirdir.
Üstəlik, bu bazalar İran İnqilab Keşikçiləri Korpusunun nəzarətindədir. "Qüds gücü" adlanan bu keşikçilər hər an savaşa hazır vəziyyətdədirlər.
İranın Suriyada güclənməsi ilə birlikdə İsrail də boş dayanmır. Məlumata görə, yəhudi dövləti ən müasir nüvə başlıqlı raketlərin istiqamətini birbaşa Tehrana tuşlayıb. Rəsmi Təl-Əvivdən bildirilib ki, ölkəyə İrandan hər hansı hücum olarsa, cavab atəşi dəhşətli olacaq.
Qeyd edək ki, İsrailin 200 ədəd nüvə başlıqlı raketi mövcuddur.