BAKI, 27 fevral — Sputnik. Türkiyə baş nazirinin müavini, hökumətin sözçüsü Bəkir Bozdağ PYD terror qruplaşmasının liderlərindən biri olan Salih Müslimün Praqa məhkəməsinin qərarı ilə sərbəst buraxılmasına münasibət bildirib.
Sputnik Azərbaycan "Habertürk"ə istinadla xəbər verir ki, Bəkir Bozdağ bu qərarın terror qruplaşmalarına dəstək xarakteri daşıdığını söyləyib.
Onun sözlərinə görə, bir çox ölkə PYD-nin əliqanlı bir terror qruplaşması olduğunu bilir: "Türkiyədə onun bir çox qanlı cinayətlərdə əli var. Belə qərarlar siyasi olur. Bu, Türkiyəyə qarşı terror fəaliyyətinə dəstək qərarıdır. Biz qəti şəkildə mübarizəmizə davam edəcəyik. Terrorların və terror qruplaşmalarının rəngi, dili, dini və mili mənsubiyyəti olmaz".
O bildirib ki, hər ölkəylə Türkiyənin arasında ekstradisiya sazişi var. Hüquqa riayət edilsəydi, onun Türkiyəyə ekstradisiya edilməsi üçün müvəqqəti olaraq həbs olunmasına qərar verilərdi.