CƏMİYYƏT
Cəmiyyətin həyatında baş verən aktual hadisələr

Milli Məclisin deputatına hücum terror aktıdır - DTX

© Photo : State Security Service of the Republic of AzerbaijanDTX-nın emblemi, arxiv şəkli
DTX-nın emblemi, arxiv şəkli - Sputnik Azərbaycan, 1920, 29.03.2023
Abunə olmaq
Faktla bağlı Cinayət Məcəlləsinin dövlət xadiminin xidməti və ya siyasi fəaliyyətinə son qoymaq, onun həyatına sui-qəsd etmə və qabaqcadan əlbir olan bir qrup şəxs tərəfindən qanunsuz olaraq odlu silah saxlama, daşıma və gəzdirmə maddələri ilə cinayət işi başlanılıb.
BAKI, 29 mart - Sputnik. Martın 28-də saat 21:51-də Azərbaycan Respublikası Milli Məclisinin deputatı Mustafa Fazil Qəzənfər oğluna yaşadığı evin qarşısında - Bakı şəhəri, Sabunçu rayonu, Zabrat-1 qəsəbəsi, Babək küçəsi ev 2 “Z” ünvanında “Kalaşnikov” konstruksiyalı avtomat silahından atəş açılaraq terror aktı törədilib. Bu barədə Dövlət Təhlükəsizliyi Xidmətinin (DTX) mətbuat xidmətinin məlumatında deyilir.
Qeyd edilib ki, terror aktı nəticəsində Fazil Mustafa bədənin sağ çiyin qurşağını və sağ budun aşağı üçdə birini dəlib keçən güllə yarası alıb. Ona zəruri tibbi xidmətlər göstərilir və vəziyyəti stabil olaraq qiymətləndirilir. Həyati təhlükəsi yoxdur.

"Faktla bağlı Azərbaycan Respublikası Dövlət Təhlükəsizliyi Xidmətinin İstintaq baş idarəsində Cinayət Məcəlləsinin 277 (dövlət xadiminin və ya ictimai xadimin xidməti və ya siyasi fəaliyyətinə son qoymaq və ya bu fəaliyyətə görə qisas almaq məqsədilə onun həyatına sui-qəsd etmə) və 228.2.1-ci (qabaqcadan əlbir olan bir qrup şəxs tərəfindən qanunsuz olaraq odlu silah, onun komplekt hissələrini, döyüş sursatı əldə etmə, saxlama, daşıma və gəzdirmə) maddələri ilə cinayət işi başlanılıb", - deyə məlumatda bildirilir.

Qeyd olunur ki, terror aktını törətmiş şəxsin və cinayət hadisəsi ilə əlaqəsi olan digər şəxslərin müəyyən olunaraq cinayət məsuliyyətinə cəlb olunması istiqamətində kompleks təxirəsalınmaz əməliyyat-istintaq tədbirləri həyata keçirilir.
İctimaiyyətə əlavə məlumat veriləcək.
Digər maraqlı xəbərləri həmçinin Sputnik Azərbaycan-ın Teleqram kanalından izləyin.
Xəbər lenti
0