BAKI, 22 aprel - Sputnik, Kəmalə Əliyeva. Azərbaycanlıların amerikalı rejissor Martin Skorsezenin baş rolları Robert De Niro və Leonardo Di Kaprionun canlandıracağı "Ay çiçəyinin qatilləri" filminin çəkiliş meydançasına getmək imkanı var.
Bu barədə məlumatı Di Kaprio Instagram sosial şəbəkəsindəki səhifəsində yerləşdirib. O, həmkarı De Niro ilə birlikdə videomüraciət yazdıraraq insanları #AllinChallenge aksiyasına qoşulmağa çağırıb. Xeyriyyə kampaniyasının məqsədi koronavirus pandemiyasının qızğın çağında çətin vəziyyətə düşən aztəminatlı ailələrə ərzaq yardımı etməkdir.
View this post on Instagram
Aktyorlar bildiriblər ki, dünyanın müxtəlif guşələrində yaşayan hər bir kəsin yeni çəkiləcək "Ay çiçəyinin qatilləri" adlı filmdə epizodik rol oynamaq və hətta filmin premyerasında iştirak etmək imkanı var. Dünya kino ulduzlarının fikrincə, bunu etmək üçün, müəyyən məbləği qurban vermək və xeyriyyə missiyasının bir hissəsi olmaq lazımdır. Aksiya başa çatandan sonra rejissor Skorseze özü filmdə çəkiləcək bəxtəvəri seçəcək. Aksiyada müxtəlif millətlərdən olan insanlar iştirak edə bilərlər.
"Ay çiçəyinin qatilləri" filmi Devid Qrannın romanının motivləri əsasında çəkilir. Filmdəki hadisələr 1920-ci illərdə Oklahomada baş verir. Süjetin mərkəzində məskunlaşdığı ərazidə neftin aşkarlanması səbəbindən oseyci tayfasının məhvi dayanır. Konspiroloji nəzəriyyələri əhatə edən və ABŞ tarixində ən dəhşətli cinayətlərdən biri hesab edilən məsələ FTB dedektifləri tərəfindən araşdırılır.
