Zülfiyyə Quluyeva, Sputnik Azərbaycan
BAKI, 16 mart — Sputnik. Qaxda burun əməliyyatı zamanı ölən qadının ölüm səbəbi bəlli olub. Sputnik Azərbaycan-ın sorğusuna TƏBİB-dən verilən cavabda bildirilir ki, Qaxda burun əməliyyatında ölən qadının ilkin diaqnozu anafilaktik şokdur. Daha dəqiq məlumat isə ancaq ekspertizanın rəyindən sonra məlum olacaq.
Qeyd edək ki, hadisə martın 11-də Qax Rayon Mərkəzi Xəstəxanasında qeydə alınıb. Balakən rayon sakini, 1997-ci il təvəllüdlü Rəyisə Layıcova burun çəpərinin deformasiyası ilə əlaqədar Qax Mərkəzi Rayon Xəstəxanasına müraciət edib.
Xəstəxananın lor-həkimi Əkrəm İmaməliyev tərəfindən əməliyyat edilərkən qızın vəziyyəti cərrahiyyə masasında qəflətən pisləşib. Daha sonra R.Layıcova orada ölüb.
Faktla bağlı Qax rayon Prokurorluğunda Cinayət Məcəlləsinin 314.2-ci (səhlənkarlıq, zərərçəkmişin ölümü ilə nəticələndikdə) maddəsi ilə cinayət işi başlanıb.
