BAKI, 23 dekabr — Sputnik. Bakının Yasamal rayonunda baş vermiş silahlı insident zamanı yaralananların sayı artıb.
Sputnik Azərbaycan-ın APA-ya istinadla məlumatına görə, "Niva" markalı avtomobildə daha bir nəfər - sərnişin İlkin Babayev də güllələnib.
Bildirilir ki, o, xəsarətini diz nahiyəsindən alıb. İ.Babayev xəstəxanaya yerləşdirilib, vəziyyəti kafi qiymətləndirilir.
Xatırladaq ki, hadisə Şərifzadə küçəsində qeydə alınıb. Binəqədi rayon sakini, 1989-cu il təvəllüdlü Muradov Zülfü İlqar oğlu naməlum şəxs tərəfindən idarə etdiyi 10-OP-021 dövlət qeydiyyat nişanlı "VAZ 2121" ("Niva") markalı avtomobilində tapança ilə güllələnib.
Ona ümumilikdə üç güllə vurulub. Yaralı ağır vəziyyətdə xəstəxanaya yerləşdirilib. Fakt araşdırılır.
