Kamal Almuradlı, Sputnik Azərbaycan
BAKI, 23 dekabr — Sputnik. Bu gün Azərbaycanda bələdiyyə seçkiləri keçirilir. Saat 8:00-da 118 seçki dairəsində 5049 seçki məntəqəsi açılıb. Sputnik Azərbaycan xəbər verir ki, Sumqayıtda 41 saylı seçki dairəsinin 8 saylı məntəqəsində saat 10:00-a olan məlumata görə hələ ki, heç bir qanun pozuntusu qeydə alınmayıb.
8 saylı məntəqənin sədri Rafiq Cavadov bildirdi ki, siyahı üzrə 1202 seçicinin 102-si artıq səs vermədə iştirak edib.
Xatırladaq ki, "Gənclər şəhəri" ərazisində 4 dairə üzrə ümumilikdə 1360 nəfər ilk dəfə səs vermək hüququ qazanıb.
Azərbaycan ərazilərinin işğalı ilə əlaqədar 7 dairədə bələdiyyə yoxdur. Səsvermədə seçki hüququ olan 4 972 356 vətəndaş iştirak edə bilər. 1606 bələdiyyə üzrə 15 156 yer uğrunda 41 462 namizəd mübarizə aparır. Səsvermə saat 19:00-da başa çatacaq. MSK-nın məlumatına görə, seçkilərdə 52 636 yerli və 17 beynəlxalq müşahidəçi akkreditə olunub. 1000 seçki məntəqəsində veb-kameralar quraşdırılıb və onlayn yayım aparılır.
