“Könüllülər Proqramının” səfiri Taleh Yüzbəyov Azərbaycan Dövlət Rəssamlıq Akademiyasının tələbələri ilə görüşüb.
150-dən çox tələbənin iştirak etdiyi görüşdə futbol üzrə Avropa çempionatının tarixi, maraqlı faktlarla yanaşı, “Könüllülər Proqramı”nın ötənilki uğurları, eləcə də AVRO-2020 ilə bağlı keçirilməsi planlaşdırılan tədbirlər haqda təqdimat nümayiş olunub.
Tədbirdə təşkilati və Avropa Futbol İttifaqı (UEFA) ilə əlaqələndirmə işlərindən məsuliyyətli olan Azərbaycan Futbol Federasiyaları Assosiasiyasının (AFFA) nümayəndələri və AVRO-2020 “Könüllülər Proqramı”nın səfiri Taleh Yüzbəyov da iştirak ediblər.
Qonaqlar tələbələrin idman və qeyri-idman sahəsində lazımi təcrübə əldə etməsi, gənclərin asudə vaxtının səmərəli təşkili, onların irimiqyaslı və ölkə əhəmiyyətli tədbirlərlə bağlı texniki bilik və bacarıqlarının artırılması baxımından bu cür tədbirlərin təşkilinin əhəmiyyətindən danışıblar.
“Könüllülər Proqramı” nəinki tələbələr, həmçinin qitə əhəmiyyətli idman tədbirinin bir hissəsi olmaq istəyən hər kəsə açıq olacaq. Proqram çərçivəsində tələbələr üçün təşkilati məsələlərlə bağlı təlimlərin, təhsil-əyləncə kurslarının, xüsusi master-klassların və sair kimi tədbirlərin keçirilməsi planlaşdırılır.
Noyabrın 15-dək davam edəcək universitet kampaniyası paytaxtda fəaliyyət göstərən 21 təhsil ocağını əhatə edəcək. Bakı üzrə “AVRO-2020 Könüllülər Proqramı”na qeydiyyat 29 noyabr saat 23:59-da yekunlaşacaq. Müraciət etmək istəyənlər UEFA-nın rəsmi portalında (https://applicantportal.enterprise.uefa.com/landing) qeydiyyatdan keçə bilərlər.
Futbol üzrə Avropa Çempionatları tarixində ilk dəfə olaraq, turnirin 60 illik yubileyini qeyd etmək məqsədilə, UEFA AVRO-2020-nin qitənin 12 şəhərində keçirilməsi qərara alınıb. Gələn yay oyunlara ev sahibliyi edəcək şəhərlər Amsterdam, Bakı, Bilbao, Buxarest, Budapeşt, Kopenhagen, Dublin, Qlazqo, London, Münhen, Roma və Sankt-Peterburqdur. Bakı Olimpiya Stadionunda 13, 17 və 21 iyun tarixlərində A qrupunun oyunları, iyulun 4-də isə 1/4 final matçı keçiriləcək.
