BAKI, 25 sentyabr — Sputnik. Sentyabrın birinci yarısından şimal bölgəsində alma yığımı mövsümü başlayıb. Builki təsərrüfat mövsümündə ölkə üzrə 270 min tondan çox alma tədarükü gözlənilir.
Sputnik Azərbaycan xəbər verir ki, bunu kənd təsərrüfatı məsələləri üzrə ekspert Nicat Nəsirli "Facebook" səhifəsində yazıb.
O bildirib ki, bu mövsüm yerli istehsalçılara şəxsi istehlakı artırmaqla dəstək verməli olacağıq. Ekspert hər bir fərdi gündəlik alma istehlakını artırmağa çağırıb: "Bu il hər bir vətəndaşa düşən alma norması 28 kq-dır, rəsmi göstəricilər deyir ki, ildə adambaşına 21 kq alma istehlak etməliyik, amma reallıqda çox aşağıdır. Odur ki, gəlin gündəlik alma normamızı artıraq və yerli fermerimizə dəstək olaq".
"Almanın xüsusi həvəskarı olan ingilislər deyirlər ki, "hər gün 1 alma yeyən insanın həkimi işsiz qalar" – deyə o yazıb.
