BAKI, 6 iyun — Sputnik. İranın Xarici İşlər naziri Məhəmməd Cavad Zərif Birləşmiş Ərəb Əmirliklərinin (BƏƏ) Fuceyra limanı yaxınlığında 4 ticarət gəmisinə edilən hücumla bağlı “Mossad” kəşfiyyat xidmətinin saxta məlumat istehsal etdiyini bildirib.
Sputnik Azərbaycan Türkiyə mətbuatına istinadla xəbər verir ki, bu barədə Zərif öz “Twitter” hesabında yazıb.
O, Ağ Evin Milli Təhlükəsizlik məsələləri üzrə məsləhətçisi Con Boltonu “yalançı çoban” kimi dəyərləndirib və “Mossad”-ın ona “saxta məlumat” verdiyini qeyd edib.
“B komandasının yalançı çobanı bir daha yalandan fəryad edir. “Mossad” Fuceyradakı hadisədə İranın əli olduğu ilə bağlı saxta məlumat yayır. Daha əvvəl də olduğu kimi “qəzalar” və saxta bayraq cəhdlərinin olacağına dair xəbərdarlıq etmişdim. Siz onların yalanlarına inansanız, nə olacağını bilirik. Bu oyunu daha əvvəl də görmüşük” – deyə Zərif əlavə edib.
Qeyd edək ki, Zərif Ağ Evin Milli Təhlükəsizlik məsələləri üzrə məsləhətçisi Con Bolton, İsrail baş naziri Binyamin Netanyahu, Səudiyyə Ərəbistanı vəliəhd şahzadəsi Məhəmməd bin Səlmanı və Əbu Dabi vəliəhd şahzadəsi Məhəmməd bin Zayidi Trampın “B komandası” adlandırıb.
Xatırladaq ki, Con Bolton keçən həftə mayın 14 –də Səudiyyə Ərəbistanına aid 2 gəminin də aralarında olduğu 4 gəmiyə edilən hücumun arxasında İranın olduğunu iddia etmiş və buna dair məlumatların BMT-nin Təhlükəsizlik Şurasına təqdim ediləcəyini bildirmişdi.
