BAKI, 12 noyabr — Sputnik. Bu gün Bakı Ağır Cinayətlər Məhkəməsində xüsusi təyinatlı vaqondan məhbusların qaçmasına yardım etməkdə təqsirləndirilən müğənni Fədayə Laçının işi üzrə məhkəmə prosesi keçirilib. Müğənninin Sputnik Azərbaycan-a açıqlama verən vəkili Türkel Süleymanlı məhkəmə prosesi haqda danışıb.
"Humanizm prinsiplərinin nəzərə alınması üçün bir müddət öncə 8 Xalq artisti tərəfindən prezident İlham Əliyevə və birinci xanım Mehriban Əliyevaya müraciət məktubu ünvanlanmışdı. Çıxışımda da humanizm prinsiplərinin nəzərə alınmasını xahiş etdim" - vəkil deyib.
"Lakin təəssüflər olsun ki, humanist addımların atılmasını görmədik. Daha sərt münasibətlər gördük" – deyə T.Süleymanlı Fədayə Laçının cəmiyyət üçün təhlükə təşkil etmədiyini və növbəti görüşlərdə hər bir dustaq kimi müğənniyə də çıxış üçün son söz veriləcəyini söyləyib.
Xatırladaq ki, müğənni ötən ilin oktyabrın 23-də Bakı-Astara-Bakı planlı dəmir yolu qarovulu ilə məhbusların qaçmasına yardım etməkdə təqsirli bilinir.
