Aprelin 2-də Tərtər rayonunun Azad Qaraqoyunlu kənd sakini Mirzə Rəhimovun evinə mərmi düşüb. Xoşbəxtlikdən, hadisə vaxtı evdə heç kim olmayıb. Nəticədə ev yararsız hala düşüb – mərmi parçaları ətrafa səpələnib.
Cəbhə xətti yaxınlığındakı yaşayış məntəqələrinin ataşə tutulmasına baxmayaraq, sakinlər evlərini tərk etmirlər.
“Əksinə, hər birimiz ordumuza dəstək olmağa hazırıq. Biz öz evimizdə, öz kəndimizdəyik”, – deyə ev yiyəsi Rəhimov bildirib.
Şənbə günü, aprelin 2-də Qarabağ münaqişəsi bölgəsində növbəti dəfə atəş səsləri eşidilib.
Bakıda atəşkəsin Ermənistan silahlı qüvvələri tərəfindən pozulduğu bildirilib. Rəsmi Yerevanda isə Azərbaycan ordusunun “hücuma keçməsindən” danışırlar.
Bazar günü, aprelin 3-də Azərbaycan Respublikasının Silahlı Qüvvələri beynəlxalq təşkilatların müraciətlərini və dövlətin apardığı sülhsevər siyasəti nəzərə alaraq birtərəfli qaydada cavab tədbirlərinin dayandırmaq və azad edilmiş ərazilərdə mövqeləri möhkəmləndirmək barədə qərar qəbul edib.
Çərşənbə axşamı, aprelin 5-i saat 12:00-da Azərbaycanın işğal olunmuş ərazilərində hər iki tərəfin razılığı əsasında hərbi əməliyyatlar dayandırılıb.
