BAKI, 15 iyul — Sputnik. Fransada baş verən qanlı terrordan sonra, bu ölkədə fövqəladə vəziyyət rejimi 3 ay daha uzadılıb. Sputnik "Akşam" qəzetinə istinadla xəbər verir ki, bunu prezident Fransua Olland deyib.
"Bastiliya qalasının alınması bayramı azadlıq bayramıdır və hücumların hədəfində bu dayanırdı. Yaralananlara kömək üçün hər cür imkanlar səfərbər edilib. Fransa yaralanıb, amma hər zaman güclü olacaq", — dövlət başçısı bildirib.
Olland qeyd edib ki, əməliyyatlar 10 min əsgərlə davam edəcək: "Sərhədlərin qorunması ilə bağlı tədbirlər görüləcək. Milli təhlükəsizlik konfransında yeni tədbirlər görəcəyik. Bizə hücum edənlərin yuvalarına girəcəyik".
Qeyd edək ki, Nitsa şəhərində sürətlə hərəkət edən yük maşını bulvarda "Bastiliya qalasının alınması" bayramı münasibəti ilə atəşfəşanlığı seyr etməyə toplaşan insanlara çırpılıb. Bundan sonra avtomobildə olan naməlum şəxslər adamlara atəş açıblar.
Fransanın Daxili İşlər Nazirliyinin açıqlamasında 84 adamın həyatını itirdiyi, 150-yə yaxın insanın yaralandığı deyilir. Yaralılardan 18-nin vəziyyəti ağır olaraq qalır.
