Azərbaycan Silahlı Qüvvələri günü respublika hərbçilərinin peşə bayramıdır. 28 may 1918-ci il tarixində Azərbaycan Demokratik Respublikası elan olunandan sonra ümdə məsələlərdən biri milli silahlı qüvvələrin yaradılması idi.
Zaqafqaziya komissarlığının qərarı ilə 1917-ci ilin dekabrında Qafqaz cəbhəsini tərk edən Rusiya ordusunun əvəzinə gürcü, erməni, müsəlman (Azərbaycan) və rus korpusları yaradılır. Korpuslar könüllülük əsasında yaradılır və 1918-ci il 26 iyun tarixində Nazirlər Şurasının qərarı ilə Müsəlman korpusunun adı dəyişdirilərək Əlahiddə Azərbaycan Korpusu qoyulur.
Müstəqiliiyimizi bərpa etdikdən sonra Azərbaycan Ali Şurası 1991-ci il 9 oktyabr tarixində Silahlı Qüvvələr Haqqında qanunu qəbul edir. Qanuna əsasən, üç ay müddətində Milli Ordunun formalaşdırılması həyata keçirilməli idi. Bununla əlaqədar olaraq 1998-ci ilədək ölkədə Silahlı Qüvvələr günü 9 oktyabr olub.
Lakin o illərdə Azərbaycan prezidenti Heydər Əliyev 1998-ci ildə 26 iyun tarixini Silahlı Qüvvələr Günü elan edir və bu gün qeyri-iş günü kimi təqvimə salınır. O vaxtdan bu gün təmtəraqla qeyd edilir. Bayram münasibətilə hər il Bakı küçələrində hərbi parad keçirilir.
