BAKI, 8 sent-Sputnik. Azərbaycan Respublikasının prezidenti İlham Əliyev Koreya Əmək Partiyasının Sədri, Koreya Xalq Demokratik Respublikasının Dövlət İşləri üzrə Komissiyasının Sədri, Koreya Xalq Ordusunun Ali Baş Komandanı, Zati-aliləri cənab Kim Çen Ina təbrik məktubu ünvanlayıb.
Sputnik president.az-a istinadla xəbər verir ki, İlham Əliyevin Kim Çen Ina ünvanladığı məktubda deyilir:
"Ölkənizin milli bayramı — Koreya Xalq Demokratik Respublikasının yaranması günü münasibətilə Sizi və xalqınızı öz adımdan və Azərbaycan xalqı adından ürəkdən təbrik edirəm.
Ümidvaram ki, ölkələrimiz arasındakı münasibətlər xalqlarımızın mənafelərinə uyğun olaraq inkişaf edəcək və möhkəmlənəcəkdir.
Belə bir əlamətdar gündə Sizə ən xoş arzularımı yetirir, dost xalqınıza əmin-amanlıq və rifah diləyirəm."
