Hədiyyə vermək və xeyirxah işlər görmək Yeni İl bayramının qanunudur. Sputnik Azərbaycan Beynəlxalq İnformasiya Agentliyi və Radiosu hər il keçirdiyi bayram xeyriyyə aksiyası ənənəsinə bu il də sadiq qalıb. Bu dəfə Ağdam rayonunun cəbhə bölgəsindəki iki kəndinin - Bənövşəli və Kolqışlağın balaca sakinlərini Yeni il bayramı münasibətilə təbrik etmək qərarına gəlib. Belə təhlükəli regionda yaşayan uşaqlar xüsusi qayğı və diqqəti daha çox haqq edirlər.
Agentliyin əməkdaşları maşını hədiyyələr, şirniyyatlar və oyuncaqlarla dolduraraq yola düzəlib. Uşaqlar nəinki bayram hədiyyəsi, eləcə də Şaxta Babanın xeyir-duasını alıblar. Şaxta Baba uşaqları bayram münasibətilə təbrik edib, onlara can sağlığı və xoşbəxtlik arzulayıb. Və əlbəttə ki, hər bir uşaq bu nağıl qəhrəmanı ilə şəkil çəkdirərək anı fotolentin yaddaşına köçürtmək fürsətini əldən verməyib.
Sputnik Azərbaycan-ın aksiyasına "Aqrar tədaruk və təchizat" ASC, "Azərpoçt" ASC, "Əli və Nino" mağazalar şəbəkəsi, o cümlədən "Avand Technology" MMC-nin əməkdaşları, 145 və 1 saylı orta məktəblərin şagirdlərinin valideynləri dəstək veriblər.
Keçirilən aksiya ilə bağlı kadrlara bizim fotolentdə baxın.
Sputnik Azərbaycan cəbhə bölgəsindəki uşaqlara hədiyyə payladı
