BAKI, 12 yan — Sputnik. Azərbaycan Mərkəzi Bankı (AMB) bu günkü valyuta hərracında yeni satış qaydalarını tətbiq edəcək. "Report"un bank dairələrindən əldə etdiyi məlumata görə, saat 12:00-da başlayan hərrac 12:45-də başa çatacaq.
Satışa 75 mln. ABŞ dolları həcmində valyuta kütləsi çıxarılıb. Satış "ən yaxşı məzənnə təklifi verən bank" prinsipi əsasında aparılaraq sifarişlərin tədricən (azalan xətt üzrə) reallaşdırılması nəzərdə tutulur.
Həmçinin, yeni qaydalara əsasən, bundan sonra AMB hərraca çıxarılan valyutanın həcmini öncədən bəyan edəcək. Gələn həftədən isə hərracların I, III və V günləri keçirilməsi qərara alınıb.
Bununla yanaşı, bildirilir ki, kommersiya bankları üçün bu gündən etibarən alış-satış məzənnəsinin müəyyənləşdirilməsi zamanı 4%-lik marja ləğv edilir. ABŞ dollarının bu günə olan rəsmi məzənnəsi 1,7742 AZN/USD təşkil edir.
