BAKI, 23 aprel-Sputnik. Dollar yenidən dünya maliyyə bazarında cövlan edəcək. Çünki ABŞ-ın Federal Ehtiyatlar Sisteminin (FED) bu il ərzində uçot dərəcəsini iki dəfə artıracağı gözlənilir.
Sputnik-in xəbərinə görə, bu barədə "Reuters" agentliyi keçirdiyi sorğunun nəticələrinə əsasən məlumat yayıb.
"Reuters"-in sorğusunda iştirak edən analitik və iqtisadçıların 80%-i ilk artımın iyun ayında, ikinci artımın isə ilin sonunda baş verəcəyini açıqlayıb.
Ekspertlərin qənaətinə görə, FED aprelin 26-27-də keçiriləcək növbəti toplantıda uçot dərəcəsini dəyişmək barədə qərar verməyəcək.
FED bu ilin martında keçirilən sonuncu iclasında uçot dərəcəsini dəyişməyib və 0,25-0,50% diapazonunda saxlayıb.
ABŞ Mərkəzi Bankı bunu qlobal iqtisadiyyatda mövcud olan risklərlə izah edib.
FED-in rəhbəri Canet Yellenin martın sonunda faiz artımında çox ehtiyatlı davranacağı barədə verdiyi açıqlamadan sonra dolların ucuzlaşması müşahidə edilirdi.
İqtisadçı-ekspert Natiq Cəfərli onda Sputnik-ə bildirmişdi ki, apreldə keçiriləcək FED-in iclasında uçot dərəcəsinin artırılması ehtimalı çox aşağıdır. Amma iyun ayında keçiriləcək toplantıda faizlərin qaldırılması ehtimalı çox yüksəkdir.
