BAKI, 5 okt — Sputnik. Azərbaycan Dövlət Pantomima Teatrında yeni tamaşanın premyerası baş tutacaq. "Ağ bığlılar" adlanan yeni tamaşanın ilk nümayişi 8 oktyabr saat 18:00-da olacaq.
Bu haqda Sputnik-ə tamaşanın rejissoru Bəhruz Vaqifoğlu məlumat verib. Rejissor tamaşanın yaranması haqqında danışıb: "Tamaşamızın adı "Ağ bığlılar"dır. Əsərin müəllifi teatrımızın aktyoru Nurlan Rüstəmovdur. Bu, onun ilk pantomim pyesidir".
"Tamaşanın qurluşçu rejissoru mənəm. Bu, mənim artıq pantomima teatrının səhnəsində sayca 8-ci tamaşamdır. Tamaşa üzərində işə keçən mövsümdən başlamışıq. Tamaşa iki insanın taleyindən bəhs edir. Həyatda insanları bir-birinə bağlayan nəyinsə olmasıdır. Əsl dost sevgisi, bir-birilərini itirmək qorxusu bu tamaşada əsas məqsədi təşkil edir", — rejissor bildirib.
O, tamaşada rol alacaq aktyorların adlarını da açıqlayıb: "Tamaşada əməkdar artist Bəhruz Vaqifoğlu, aktyorlardan Nurlan Rüstəmov, Solmaz Bədəlova, Səbirə Həsənova, Rafael Şahbəyli, Leyla Atayeva, Nuridə Musabəyli iştirak edəcək".
Qeyd edək ki, tamaşa pantomim-qratesk janrındadır. Buradakı personajların ağ bığlı olmaları tamaşanın obrazlarının xarakterik formasıdır. Tamaşanın adı da, məhz buna uyğunlaşdırılıb.
